حكي من النفس

اليوم الفير حسيت بضيقة من كذا شغلة طبعاً طلعت حرتي بشي ما له شغل بالسالفة نمت ورديت قعدت الساعة ثمان رحت الميداني ولا حدي راهية مداومة على كيفي طبعاً ما كان في شغل اليوم ولا حتى باجر عقب باجر راح يبدي الشغل الجد انحكرت تقريباً ساعتين بروحي ماكو أحد معاي بالمكان دقيت على خالتي ولا اهيا بمدرسة ولدها ما كانت تقدر تكلمني على راحتها ماكو شي أسوية لاعت جبدي قعدت أفكر بأشياء واايد مريت فيها دايما لما أسوي شي ويكون زين ما ألقى تشجيع من أحد مع إني أشجع غيري على واايد أشياء وأحب أخلي اللي معاي يحس بالإيجابية لما يكلمني لكن قعدت أذكر منو يشجعني صراحة ما لقيت أحد إلا نفسي مريت بأمور وعقبات كثيرة في حياتي ما شكيت لأي شخص ولا قلت ليش أنا وليش مو غيري كنت أسكت واللي يكسرون فيني من كل صوب التحدي كان في نفسي وما أبالغ إن قلت عندي إصرار مو طبيعي على تحقيق أي شي أبيه لو بعد شنو المهم أتحدى نفسي وأعمله

لما أكون مع بعض المتدييين دايماً يحسسوني إني مو ملتزمة نفسهم وعندي ميل للتحرر ولما أكون مع المتحررين يحسسوني إني متشددة ومتزمتة بعض المرات أقول ليش جذي الخلل فيني ولا فيهم أي أنا متشددة في بعض الأمور ولا أقبل التنازل عنها لكن بنفس الوقت ما أحب أفرض شي مو مقتنع فيه اللي معاي أحس إذا سويت جذي ما أستحي
أحب أصادق وأتناقش مع المختلفين عني مع استيائي من بعض الملتزمين جداً جداً لدرجة كل شي حرام لكن أحس معاهم بالراحة أحس إن لهم قلب نظيف وأحس بالهدووء في تواجدهم والمتحررين سواء كانوا عادي ولا جداً أحس إن لهم نظرة لداخل نفسي أحب أسمع كلامهم أفكارهم وأحس عندهم إحترام لشخصي مهما كنت ودايماً يخلوني أفكر بشيء لم أكن أفكر فيه من قبل


الإنطباع اللي دايما يقولون لي الناس عني أول ما يشوفوني أو يعرفوني إني عصبية ونفسية أستغرب من هالكلام والأغرب إن أكثر من شخص قالي هالكلام حاولت أنتبيه لتصرفاتي وأفعالي لما أشوف أي شخص أول مره وعرفت إن أي شي بداخلي يبين عليّ على طووول كنت مستانسة راح يبين عليّ وهمم إن كنت معصبة يبين عليّ وأنا أعصب وايد حتى من الأمور التافهه وخاصة إذا كان الشخص اللي جدامي بارد أتنرفز لكن إن كان شخص عصبي يتغيّر طبعي مره وحدة أصير هادية لكن يبين على ويهي أقول حق بعض البنات اللي أعرفهم ويلبسون نقاب يا حظكم لأن محد يعرف انتوا تضحكون ولا معصبين ومرتاحيين




لما أعرف شخص أو أسوي شي أحب أهتم فيه وأعطي من نفسي وااايدما أطلب مقابل سوى كلمة طيبة اتنسيني تعبني ومحاتاتي في أمور واايد حاولت أوخر عنها في حياتي ما قدرت ما أحب أترك شي كنت جزء منه يكون هالشي مثل علاقة فيها إخلاص أحس مثل ما أخلصت لهذا الشخص أو الشي راح يخلص لي وأنا راح أربح أخيراً







مره أمي قالت حق رفيجة خالتي محد مريحني إلا لطيفة واهيا الوحيدة اللي راح تهتم فيني أمي ما قالت هالكلام جدامي لكن رفيجة خالتي قالت لي ما أنكر إني انصدمت من هالكلام لأن أنا وأمي دايماً عكس بعض اهيا اتعصب أنا باردة أنا أعصب اهيا باردة والمزاج كله كله بالمقلوب ما نتفق على شي حتى لما اتكلمني أحسها تصارخ عليّ فأقولها يمه ليش تصارخين عليّ أنا يمج وأسمع فتعصب أكثر وتقول إنتي ما تستحين بعد اتنرفزيني ما أعلّق وأغير مكاني بعض المرات أكون متضايقة خلاص ما أتحمل اهيا تسألني اشفيج أقولها ما فيني شي مرّة قالت أنتي ما تتكلمين معاي ما تقولين لي شصير معاج ولا اتخليني اشاركج بحياتج قلت لها أنا تعلمت منج إني أعتمد على نفسي ولا أحتاج أي شخص ولا أبي أعور راسج بسوالفي كان هالشي يخليها ما تفتح هالسيرة مره ثانية فصارت ما تسألني عن شي مره رديت البيت نفسيتي تعبانة ما تغديت نمت من العصر لي الفير قعدت وشفتها قاعدة ما سألتني اشفيج ولا ليش طولتي بالنومة احتريت قلت ليش ما تسألني ليش ما تحس فيني وتذكرت شنو قلت لها من قبل فأقول بقلبي ما ألومها أنا حطيت حاجز بينا لكن هالحاجز حطيتة من خوفي واهتمامي فيها اهيا ربتني أنا وأخواني وكبرنا وكل واحد تخرج من تخصص مميز واللي يشتغل واللي يكمل دراستة تحملّت 7 أولاد وربتهم من غير أبو ولا قصرت علينا بأي شي نطلبة كانت تشتغل عشاني وعشان أخواني تحملت أشياء وااايد ومحد وقف معاها ومشاكلي وهمومي ما أبي أخليها ثقل عليها أبيها ما اتحس لا بضيقتي ولا حزني ولا بأي شي مو زين وكل ما يصير شي حلو وزين لي أدق عليها أول وحدة أفرحها أبي تعرف تعبها ماراح على الفاضي في أمور وايد تنازلت عنها عشانها وودي أسوي لها كل شي أحبها وااايد بس مابي أتعبها معاااي المهم أشوفها مرتاحة وتفتخر فيني وبأخواني



بنت خالتي كانت قاعدة يمي وأنا كنت أكتب بوست سابق قالت لي تبي تقرأ شنو كاتبة خليتها تقرأ بس البوستات العادية بس البوستات اللي أكتب فيها عن مشاعري إتجاه شخص تعرفة ومن أهلي أحس بشي غلط ما تعودت أقول إحساسي لأي شخص من أهلي عن أهلي قالت لي خل أقرأ هذا قلت لها أستحي تضحك تقول تستحين مني وفي وايد يقرون كلامج ويعرفونج قلت بس الكلام مو عنهم ومو الكل يعرفون كل أهلي هل هالشي طبيعي إني أخذ راحتي بالتعبير عن مشاعري جدام بعض الناس اللي ما يعرفون إلا اسمي واللي يعرفوني عدل أخجل منهم


بعض المرات أفكر أقول إذا مت جم شخص راح يذكرني بخير جم شخص راح يبجي وجم شخص راح يفرح بموتي وأقعد أفكر بردة فعل شخص شخص أعرفة وهالشي الوحيد اللي يخليني أنسى كل شخص ظلمني أو غلط عليّ مابي أحد يكرهني لما أموووت أبي شعور بفقداني صج مابي أحد يسكت لما يبون اسمي أبي لما يتذكروني يدعون لي ويقولون الله يرحمها خوش بنت كانت يذكروني بالزين


اليوم سلمت عليّ الفراشة بمكان الميداني أعرفها من قبل فسألتني خلصتي دراسة والحين شغل قلت أي الحمدلله فضحكتني قالت وين هدية ههههههههه قلت لا لازم انتي جيب هدية مو أنا جان اتعصب عليّ جان أقولها إن شاء الله خلاص خلاص أنا سوي حفلة مع كلو بنات جيب هدية حق انتي جان اتشق الحلج جان تقول كويس كويس قلت ما شاء الله تعرفين مصري قالت ايوه هذا دكتور مصري انا يعرف شقول قلت انزين روحي خل أقعد أفكر أحسن جان اتمد ايدها اتسّلم عليّ مديت ايدي حسيت شي صار فيني ايدها واايد خشنة اكسرت خاطري حيل مع إنها مو كبيرة بالعمر بس عورت قلبي وراحت جان اترد بعد ربع ساعة يبي قهوة شاي قلت أي ابي قهوة يحليلها ما قصرت يابت لي قهوة ريّحت بالي



موجود معاي دكتور مسيحي بس قليل علية كلمة محترم ووايد أسلوبه راقي قعدت أقول بقلبي ياارب هذا المسيحي يا زين أخلاقة لو يكمل ويصير مسلم راح يكون شي حلوو مسلم وأخلاق راقية وعكس هذا في واحد ثاني مسلم بس أقشر ماكو أسلوب تعامل ولا شي سبحان الله ماكو شخص كامل وبعدين فكرت بطرق الدعوة بالإسلام حسيت إن قليل اللي صايرين ينشرون الإسلام بطريقة سمحة ومحببة وجاذبة للأخر يعني الاهتمام صار بس في نبذ الأخر تكفيره تنفيرة من الإسلام وشن حرب على المختلف ليش ما نحرص على نشر الإسلام بشكل يبين مكانة هالدين العظيم اتبين أخلاق الرسول صلى الله عليه وسلم وتعاملة مع المسلمين واليهود والنصارى ليش بس كله نقول لالالالا حرام حرام حرام ليش ما نتكلم عن الحلال والحلال مجالة أكبر وأوسع من الحرام ليش ما نبين إن الإسلام دين تعامل وأخلاق قبل كل شيء قبل صلاتنا وصيامنا وهذا طبعاً ما يقلل من أهمية الصلاة والصيام لكن لتكون علاقتنا مع الناس مهمة وأنا أحب هالأحاديث كله لما أعصب ولا أحس بغضب على شخص ما أذكر هالأحاديث تهدي نفسي قال الرسول صلى الله عليه وسلم دخل رجلان الجنة، صلاتهما وصيامهما وحجهما وجهادهما واصطناعهما للخير واحد، ويفضل أحدهما على صاحبه بحسن الخلق كما بين المشرق والمغرب‏ وهذا الحديث الثاني بعد قال صلى الله عليه وسلم إن أحبكم إلي وأقربكم مني في الآخرة مجالس محاسنكم أخلاقا وإن أبغضكم إلي وأبعدكم مني في الآخرة مساويكم أخلاقا الثرثارون المتفيهقون المتشدقون‏




وأنا بالطريج برد البيت كنت أسوي شي يضحك بالسيارة كنت مشغلة العفاسي وخلصت التلاوة وبعدها كان دعاء قعدت أفكر بالدعاء وتذكرت كلام مشاري الخراز ليش إحنا نتأثر بالدعاء أكثر من القرآن والسبب إن بالدعاء نكون في حديث وحوار مع الله ونتنظر منه جواب مثلاً لما نقول اللهم إرزقني الجنة الصج الصج هالكلام يأثر فيني واايد لأني أحس إن الله راح يستجيب دعائي وحواري وكلامي ومناجاتي له خلص الدعاء جان أقصر وقلت بتكلم وبقول بقلبي وأنا أدري إن الله يسمعني بس بحس بلذة الشعور إني أتكلم مع الله ومتيقنة بالإجابة أول شي سكت اشوي بعدين تكلمت ورديت سكت جان أرد اتكلم واتكلم ولا يرن تلفوني يخرعني امي تقولي يلا متي توصلين قلت لها خرعتيني كنت بعالم ثاني قالت هذا وين هههههههههههههه قلت أقصد بالتفكير مو بمكان صج


بعض المرات أكتب شي أحس ماراح يفيد أي شخص بس راح استمتع وأنا أقرأ بعد فترة شي كتبته عن نفسي ويرجع فيني ذكريات ومواقف




وإذا أحد زعلان مني خل يسامحني وإذا في تعليق أو أي شي كتبته

وضايق أحد ترى ما أقصد جد بس لما أكتب شي أحس بالراحة

وأكتب من غير تدقيق وتفكير مسبق

:)