2010/12/29

وجدت أن ... (1)

كل المشكلات والمعضلات السياسية،الإقتصادية،الصحية وغيرها ترجع لمصدر واحد وهو مشكله إجتماعية تتشكّل على وجوه مختلفة.

2010/12/22

صمت اجباري!






أول ما تغيّر الجو ماكان في أي ردة فعل من جسمي لكن حكم القوي على الضعيف بعدها بفترة قعدت أسبوعين أعاني من الألم ومحد راضي يحس والحساسية النفسية زايدة،الوضع كان متأزم لدرجة كان ودي أموت يومين وارجع وأنا بصحة وعافية،صداع يقتل،كحة أتوقع إنه صار تمزق بصدري من الجفاف اللي كان فيها،والخشم مصكر 17 يوم بالضبط،وأحلى مافي الموضوع إني نزلت 4 كيلو.. لكن الوجه أصفر وأشكره مرض!أخوي يقول حلاته اتمين سنة مريضة عشان ينزل الوزن من غير دايت ولا حنّه!! يا سلام عليك

قعدت مرتاحة فترة زوينه،وقعدت أحن على أمي وأخواني نروح البر،ولا معانا خالي وعياله وزوجته،ويدتي بعد! أحنّ أحنّ ماكو فايدة،حتى في يوم أغبر قلت خل أحنّ مع إنه ماكان من قلبي وقتها،ولا الكل قال يالله خل نروح،الأغلب ماخذ إجازة وقتها فكان الترحيب ايوا يالله مشينا ولا بعد النية كانت انام هناك.

صعدت داري أجهز أغراضي،مادري شنو أخذ،قعدت ساعة أفكرّ،وبعد الصراخ اللي ينادي واللي يبي شي،نسيت نفسي ولا وإحنا قاعدين ونشرب حليب ولا الجو براد صج،وأنا لابسه لبس خفيف،نص ساعة صوتي بدىيغيّر مساره هاهاها،بعد 4 ساعات بدى يختفي،وصار باجر لا اشوه رجع صوتي الحبيب،وخلال هالجم يوم كان الصوت بين وبين. وأمس رجعنا البيت،ريّحت ولا أنا بالنوم العميق،الصبح قعدني اتصال خالتي،أقول ألو محد يرد عليّ،أقول ألو ولا اهيا بعد ألو،وأرد ألو هلا خالتي،ولا اتسده ابويهي،ماكو مشاكل لأني برد أنام،لكن بعدين عرفت إنه ماكانت في صوت يطلع وعلى بالها رديت من غير لا أدري.

من الصبح وأنا أعابل بصوتي والشمّاته عندي وايد،اللي يضحك واللي يعيّب واللي أكسر خاطره كل اشوي يطالعني على باله أبي شي،وأمي حبيبتي تشوف ويهي لما أبي شي وتشوف حركة من غير صوت وملامحها تعبّر عن الوضع المؤسف اللي بنتها فيه هاهاها.


الغريب في كل هذا إني هالسنة مرضت مرتين،وطوّلت بعد والعادة مره وحدها 3 إلى 5 أيام وبس، والتحليل ينقسم إلى أقسام:تطهير ذنوب،ماكو مناعة،الكبر شين،أحد داعي عليّ،كنت بقول صوتي مزعج لكن لالالالا مش مزعج الحمدلله. والشي الحلو إني مو مضطرة أتجاوب مع اللي تسولف معاي لأن السالفة مالها داعي.

مجرّد تفريغ حالة صمت!

2010/12/09

آمين


إلهي أرجوك أن تُنزل بلاء صعب دفعهُ على كل من يريد سوء بالكويت،وأن تُشغله بنفسه بعيداً عن الكويت وإن كان من لحمي ودمي.