2009/04/23

مادري شسوي ؟

ما أعرف شلون بشرح قصدي بالكلام ولا شنو بقوله بالضبط بس أتمنى أعرف لو كنتوا في مكاني شراح تسوون في وحدة أعرفها وعلاقتي فيها قوية جداً كانت تعبانة من فترة وكل مره يسون لها تحاليل وفحوصات ويقولون ما فيج شي واهيا كانت تعبانة واتعبت أكثر من كثر ما تروح المستشفى ونفسيتها إتعبت بشكل كبير اهيا كبيرة بالعمر تقريباً عمرها 39 وبهذا العمر صعب الشخص تتعب نفسيته من بعد ما حنيت عليها اتغير المستشفى الدايخ اللي اهيا فيه وتروح واحد ثاني رضت مع إنها تقول شبصير يعني نفس الكلام ونفس التحاليل وأنا بتعب لكن وافقت وراحت المستشفى الثاني وعملت التحاليل والفحوصات كاملة وأختي تشتغل هناك و ساعدتني بمعرفة النتيجة قبل لا يكون الموعد المخصص ما توقعت إن النتيجة بتكون سلبية وقبل هذا هالوحدة مريضة من قبل في مرض الثلاسيميا مادري هل هذا المصطلح الصحيح أو لأ لكن اهوا مثل فقر الدم وتكون نسبة الحديد عالية جداً وهذا الشيء أثر عليها وايد مع عدد الأدوية المختلفة اللي تاخذها وبعض الإبر لتخفيف نسبة الحديد وكل شهرين أو ثلاث تاخذ دم ونتيجة التحليل إنها مصابة بتليف في الكبد ومؤثر على صحتها وكذلك في أعراض كثيرة ظاهره عليها وتأثر على يومها وحياتها الدكتور طلب عمل فحوصات أخرى للتأكد لمعرفة هل تحتاج لزراعة الكبد لأن كما قال إنها في مرحلة متقدمة وتقريباً ما بقى شي من الكبد لكن عليه التأكد قبل كل شيء لتكون الصورة أوضح له ولها مع كل هذا هي ما درت عن النتيجة لأن موعدها الأسبوع القادم وقالت أختي لا تقولين لها شيء لأن لازم يتأكد الدكتور بعدين يقول لها عشان نفسيتها لا تتأثر وياخذ الأمر جانب سلبي وخاصة إنها جداً حساسة وكتومة اليوم كنت معاها ما أقدر أشرح الوضع اللي كنت أشعر فيه كنت أضحك معاها وأحاول أخش خوفي ولا أبين لها شي لكن ما قدرت انقمت ووخرت عنها اشوي أرفع من شعوري إتجاه هالشي صارلي أكثر من مره أطلب منها نروح نطلع نستانس ما تبي تقولي تعبانة مالها خلق كل مره أروح عندها أقعد معاها ويكون عندي ألف شغله اسويها لكن خايفة أفقدها وما أكون معاها ولا أكون يمها في أشياء ما أحبها ولا اطيق اعملها لكن قمت اعاند نفسي عشانها لما أشوفها تضحك أحس إني أنا اللي ضحكت كان عندها صديقات عندهم نفس مرضها كلهم ماتوا وعمرهم صغير وكانت دايماً تقول لاحقتهم لاحقتهم قلت لها كلنا رايحين مو بس اهما ولا أنتي قالت بتروحين وغيرج بروح بطريقة عادية من غير معاناة ولا ألم ولا معايشة مرض من طفولتج أما إحنا غير عنكم ولا أحد فيكم بعرف ما نعانية من ألم جسدي ونفسي وبعدين تقول الحمدلله على كل حال أسكت بعد كلامها وابتسم لها وأقول محد يضمن اشكثر بعيش ولا متى بموت لكن الأمل هو الطريج لج ولي وللكل أشوفها اتنزل راسها ودمعتها ابعينها واتغير الموضوع مادري شراح يصير فيها لي درت نفسيتها راح تتعب وأنا ما فيني أتحمل وأحبها بشكل كبير ولا أقدر أسوي شي لها ولو بيدي جان عطيتها من صحتي ولا أشوف دموعها وألمها

هناك 38 تعليقًا:

Q80 Blogger يقول...

Thalassemia

مرض وراثي .. يأثر على الحديد المكون لكريات الدم الحمراء فيمنعها من التكون بشكل صحيح !
وهذا الي يسبب فقر الدم الحاد !

علاجه .. نقل دام باستمرار

طبعا النقل له اعراض جانبيه كثيره


ان شاء الله يطلع تحليل الدكتور مو دقيق ويطلع مافيها شي رفيجتج .. او يكون فيها شي بسيط باذن الله

لكن مع انواع الامراض هذي .. صراحه مادري اشلون راح يكون تعاملج مع الموقف .. اتوقع لو تسئلين الطبيب راح يكون له خبره اكثر في نقل الخبر وايضا التخفيف المستمر على المريض
طبعا اهم شي اهم شي .. التمسك برب العالمين .. وخل تعرف انه كل شي إن شاء الله بأجره ومكتووب لها بميزان اعمالها .. وهذا كله اختبار وان شاء الله تنجح فيه .. وماكو شي على الله بعيد .. يخلق الحي من الميت والميت من الحي .. مايعجزه إنه يشفيها بدقايق .. آمين يا رب


وهذي أهم مشاكل الزواج بدون فحص .. لو كان قانون الفحص قبل الزواج مقر منذ زمن .. جان قدرنا نتخلص من امراض مثل هذا .. لأن هذا المرض يشترط فيه إن يكون الابوين حاملين للمرض .. مو شرط مصابين فيه .. لكن حاملين جين المرض !!!!
فنصيحه للكل .. الفحص قبل الزواج .. ضرووووووره


طولت عليج .. عسى الله يجبر بخاطرها ويعينها ويشافيها ويسخرج لها .. وتكونين لها عون دايم !!

وان شاء الله كل هالكلام يطلع على الفاضي ويطلع ماكو غير العافيه

Super Woman يقول...

الله يشفيها ويعافيها
وصدقيني بهالوقت كل شي له علاج اذا اهي رضت تعالج

انا اقول لو تروح بره يراعونها وتصد شوي عن الناس والديره يمكن احسن لها


:)

قلبج كبير مشاء الله عليج
بس لازم تصيرين قويه جدامها

glomhilda يقول...

السلام عليكم ورحمة الله وبركاته،،

أخيتي عزيزتي،،

تمالكي نفسك وكوني قوية عشانها..لازم تشدي على يدها وتحقنيها بالصبر والايمان

ربك قادر إنه يشفيها في لحظة..بس عليكِ بالدعاء
ووصيها هي بعد بالدعاء بإلحاح وخصوصي قيام الليل..
وخليها تقرأ سورة البقرة لمدة 40 يوم
صدقيني نصيحة مجربة..لسورة البقرة إعجاز عظيم..


لا تقوليلها شي وخليها تعرف من الطبيب أحسن..وكوني جنبها لمن تستقبل الخبر

قوليلها إن هي محظوظة لأن الله يمحص ذنوبها بهالمرض وإنها إذا صبرت راح تكون من الذين يدخلون الجنة بغير حساب..


أسأل الله العظيم رب العرش العظيم أن يشفيها شفاءاً لا يغادر سقما.

كبرياء انثى يقول...

والله أنا احترت أكثر منج
ما عندج غير الدعاء وحاولي كثر ماتقدرين ما تضعفين جدامها والله يكتب فيه الخير

Nikon 8 يقول...

لا حول ولا قوة إلا بالله العلي العظيم
والحمد الله على كل حال
حاولي يا إختي إنج تزرعين بقلبها وروحها الأمل
حقيقة دمعت عيني وأنا أقرأ البوست أصعب شي إن الواحد يعرف إن أيامه قليلة بالحياة
الله يعينج يا أختي فرعاية المريض أيضا صعبة ... والله يشافيها مريضتكم
تليف شبه كامل والمستشفى القديم يقول ما فيها شي ؟
البنت تشكي وحالتها تعبانة وهم مو دارين ؟
الأمل بقدر الله سبحانه وتعالى وتقدم الطب
وسلامتكم جميعا

fatto يقول...

مابيدج اتسوين شي الي قاعده اتسوينه اهوالصح انج تقعدين معاها وتونسينها وتغيرين الجو الي اهي فيه ..وتخففين عذابها.

الله يشفيها يارب وخفف عنها المرض والله يعينج معاها الصراحه خوش صديقه انتي الي ماتخليتي عنها ابهالوقت والله في ناس ابهالمواقف مالهم خلق يقولون يااالله نفسي ..

الله يشفي كل مريض يارب

princess adadi يقول...

بصراحة خنقتني العبرة وانا اقرى

الله يعينها ويعينج يا رب

الحين ما بيدج غير انج تكونين يمها وتدعين لها

بصراحة مادري شقول الموقف صعب :(

سعد المحطب يقول...

الله يشفيها وياجرها على مرضها ..

مثل ما قلتي .. كلنا بهالدرب ..

ادري مو وقته .. بس يقول المتنبي

من لم يمت بالسيف مات بغيره
تعددت الأسباب والموت واحد

واسيها .. قوليلها حتى لو بتموت بمرض وألم فإن شاء الله كل شي بأجره

بعد طولة العمر إن شاء الله

maha يقول...

مو عارفة شنو اكتب
الله يعينج

العرزالــــــه يقول...

الله يعينكم عاد الثلاسيميا مشكله

عموما انا بالشوفه وايميلي عندج

وسلامات ماتشوفون شر

ملح الحياة يقول...

يا الله يوم شفت كلامك خنقتني دموعي وحسيت برغبه ملحه في البكاء.لكن يا اخيتي الحبيبه هي يجب ات تعرف هذا مرضها وهي احق انسانه ان تعرف به.اذا كانت مؤمنه بالله فعلا فلتقبل بقدره ولا تعترض رغم ان الامر مر عليها وعلكي اكثر.....
لو كنت مكانك لما استطعت ان احرك ساكن لاني ضعيفة وحساسه لكني احاول ان ابث فيك شيء لو انا كنت مكانك لفتقدته.
لكن الهدف من كلامي معك هو ان اشد بيدك واقول لكي هذه هي الحياة.لولا لطف الله بنا لنفطرت المرائر.
تقبلي مروري.

U-Turn يقول...

ما بيدج ولا بيدنا غير الدعاء :]
والمفروض انتي أكثر وحده تعرفين هالشي
أدري انه شي صعب
بس انا عرفتج وميزتج من قوة إيمانج مشاء الله

الله يشافيها ويعافييها يارب
ويهون عليها
ويساعدج

خلي إيمانج بالله قوي
ومحد يموت قبل يومه

والإنسان من اول ما يطلع مكتوب له كل شي
حتى طريقة موته

ومحد باقي غيره سبحانه

وان شاء الله ماكو إلا العافيه
بس انتي لا تحاتيين :)

غير معرف يقول...

مرحبا
بصراحه مريت وقريت هالبوست عالسريع
واسأل الله ان يشافيها ويشافي المسلمين اجمعين
وعسا الله لا يفرقكم يارب ويخليها لج

مع تحياتي:
اختك في الله :)

Just A Bunch يقول...

لا حول و لا قوة الا بالله ...
الله يعينها و يعينكم اجمعين ..

ادعي لها ...

Kuwait يقول...

مشكلتنا ضعف الإيمان بأول ما نطيح بمصيبـه :)
تلاقينا تبجي ونفسيتنا بأردى مراحلها تكون وهذا من سلبياتنا ويأثر على العلاج لان أول خطوه بالعلاج النفسيه :)
المفروض رفيجتج يكون ايمانها بالله قوي والي ربي كاتبه علينا بنشوفه والمرض تكفير ذنوب " ان الله اذا أحب عبده إبتلاه "
والمرض إبتلاء من رب العالمين ياما ناس عاشت طول عمرها مع مرض اعرفت تتعامل معاه وتعايش نفسها معاه رغم الألم وياما ناس مرتاحه بحياتها ماتت موتت فجأه بحادث مؤلم ..
انا بالذات بمسألة المرض دايما ما اشوف الناس الصاحيه لكن اوجه نظري للناس الي مرضها أخطر من مرضي وللناس الي عمرها أصغر من عمري وقاعده تصارع مرض أقوى من مرضي عايشه ومعنوياتها عاليه وايمانها بالله قوي حزتها الواحد يوعى لنفسه ويشكر ربـه على كـل حال وتأكدي يا لطووفه ان كـل الي ربي كاتبها لها فهو خير لها :)
عمره ربي ما قسى على عبده المؤمن "ان الله غفور رحيم":)

بحار يقول...

مساء الورد,
بصراحه ما ادري شقول انا عايشت نفس الحاله مع اخوي الله يرحمه .
ولكن من كلام رفيجتج لح كأنها كانت تعاني من مرض وهي صغيره او شي جذيه , شوفي بيني وبينج لا تحاولين تبينين انها مسكينه ولا تخلينها تشوف نظرات الرأفه بعينج عليها لا هالنظرات تزعجها ولو ما بينت لج , انتي ادعيلها بالشفاء والله ما يخلي عبده عسى يكون لها تكفير عن الذنوب , ادري بتقولين انك مو حاس فيني بس صدقيني عشت مثل هالموقف وكنت اروحي يوميا وعمري 14 سنه للمستشفى اسال عن اخوي وانا بروحي :-) ان شاء الله تعدي على خير بس انتي اهم شي ادعيلها ولا تبينين لها اي شي من خوفج عليها خليج طبيعية .
والله يشافيها ويخليها لج ولا يفرقكم.
شكرا وتقبلي مروري.

صبا يقول...

بعد قلبي كل هذا بقلبج
يا قلبي ...

حبيبتي ..اول شي لازم يتاكد الدكتور
وبعدين تبدي مرحلة المواجهه ولازم تكون بطريقة مصارحه هاديه من غير تخريع وزعل ..مثل انتي مريضه وكل شي له علاج والطب تقدم ...ولا زم تامنين بالقضاء والقدر ....الخ
وانتي عارفه هالسوالف ما له داعي اقولج

اول شي راح يكون صعب عليها
بس بعدين انشالله راح تتقبل اذا ايمانها قوي ...وهذا راح يساعدها بالعلاج
حاولي تذكينها بمواقف مثل موقفها وانهم شفو تماما
ولا يخفي عليح ...مرض السرطان اللعين
وكل شي له علاج وبأمر الله الواحد الاحد

الله يشفيها ياااارب
ويخفف عنها كم الالم الي تحمله في داخلها

والله المستعان
....
تعالي بسالج الملحدين لي حاشهم مرض شيقولون ...!!
ويستنجدون في منووووو؟؟!!؟؟!!

ReLaaaX يقول...

ياقليبي بيدج وبيدنا كلنا ندعي لها

+ الصدقه
داووا مرضاكم بالصدقه او كما قال حبيبي صلى الله عليه وسلم

--

ادري ان الشي جايد ، بس شبيدنا غير ان نسلم امرنا لله عز وجل



ماتدرين يمكن تكون الصدقات والادعيه والتقرب من الله سبب من اسباب شفاءها ، مافيه شي بعيد عن رب العالمين



الله يصبرها ويصبرج ويشافي مرضانا ومرضى المسلمين

غير معرف يقول...

مرض يحتاج تبرع بالدم ونقله لها بشكل دوري

كلنا بنموت ... بطريقة او بأخرى

لله المستعان

حياتي هدف مو عبث يقول...

Q80 Blogger

صحيح أمها وأبوها حاملين أو مصابين شي جذي اهيا اطلعت مصابة بالمرض واخوها واختها اللب بعدها حاملين للمرض فقط
:)

حياتي هدف مو عبث يقول...

ShLaLaT

أميين
اهيا أقوى مني وااايد
لكن المشكلة انها تسكت أكثر
وهذه مشكلة
القلب كبير لها لأنها تستحق جداً

حياتي هدف مو عبث يقول...

glomhilda

عليكم السلام ورحمة الله

حاضر .. مشكوورة أختي العزيزة :)

حياتي هدف مو عبث يقول...

كبرياء أنثى

دعوااتج
وأسفة خليتج تحتارين

حياتي هدف مو عبث يقول...

Nikon 8

اسفة اذا سبب البوست أي ضيق لج
:)
اي نعم المستشفى يقولون لها ماكو شي هذا مجرد تعب لأنك أصلا مريضة
احباط مو طبيعي
دعوااتج

حياتي هدف مو عبث يقول...

فاتوو

ما باليد حيله
اميين ...
هي خوش صديقة وإنسانة محبة جداً
الله يشفيها ويرزقها الصحة والعافية
وكل المرضى يارب

حياتي هدف مو عبث يقول...

برنسيس

صعب واايد
دعواتج
وشدي حيلج بالامتحانات :)

حياتي هدف مو عبث يقول...

اجتماعي


كلنا ميتين أدري أدري
الأمر متعب
شكرا لك أخي

حياتي هدف مو عبث يقول...

مها

أدري
دعواتك

حياتي هدف مو عبث يقول...

العرزالة

صحيح
يسلمك والشر ما ييك
أدري فيك ما تقصر
مشكووور

حياتي هدف مو عبث يقول...

ملح الحياة

مو قصدي أضايقج ولا أضايق أي شخص
أدري لازم تعرف لكن لازم يتم التأكد
ومو أنا اللي أقولها الدكتور له خبره ودراية بالنفسيات وبعدها يأتي دوري

حياتي هدف مو عبث يقول...

يو تيرن


أمييين
واشكرج على حسن ظنج وكلماتج الجميلة
دعواتج أختي :)

حياتي هدف مو عبث يقول...

غير معرف


أميين

مشكورة أختي

حياتي هدف مو عبث يقول...

just a bunch of thoughts

أميين ..

حاااضر

حياتي هدف مو عبث يقول...

كويت

صحيح كلامج لكن أحياناً من هول الصدمة على المريض ما تعرفين شنو ممكن يفكر ولا ردة فعلة وخاصة انها تسكت كثير
الله يعين

حياتي هدف مو عبث يقول...

بحار مهموم

مساء النور

الله يرحمه ويغفر له
هذا اللي بصير
دعواتك

حياتي هدف مو عبث يقول...

صبا

ربك يستر لا تنصدم ولا يصير فيها شي
دعواااتج

ــــ

بالعلم يمكن :)

حياتي هدف مو عبث يقول...

ريلاكس

أكيييد
دعواتج

حياتي هدف مو عبث يقول...

حجر كريم


شوفي ايميلج