بيبسي بالحر وياهل يذوق المر

قبل يومين الظهر ووقت الحر شفت هندي مع هندي ثاني يتقاسمون قوطي بيبسي صغير صب له بقلاص نايلون واهم يشتغلون مثل الأمن شي جذي وأنا كنت قاعدة أحاسب الأغراض اللي شريتهم وأشرب ماي بارد وأحس جبدي برد معاي من كثر ما كنت عطشانة وكان حر مشيت ومريت يمهم واحد منهم راح والثاني يشرب اشوي ويخش اشوي وأستغربت من إنهم تقاسموا البيبسي مع إنه قوطي صغير اللي يشربة شخص واحد كملت طريقي مادري ليش قلبي عورني عليهم رديت بسرعة شريت 2 بيبسي نفس اللي كان عندهم وبارد وايد مع ككاو وعطيتة حق اللي كان موجود أول شي على باله إنه بخلي الجيس عنده قلت لأ لأ هذا حقك أشربه بارد وككاو بعد ومشيت وحسيت بشعور مريح مع إنه بيبسي مو شي كبير

وأمس كنت مع بنت أختي الصغيرة رايحين السوق توني بنزل من السيارة ولا ياهل صغير واقف عند باب سيارتي وعرفت إنه يبي مساعدة بطلت الجام قلت نعم
قال:محتاج فلوس والكلام المعتاد الله يخليج ...الخ
قلت : حق شنو تبيهم؟
قال: عشان أخوي الصغير يبي حليب
ولا اتنط بنت أختي تقول
قوليله بالبيت عندنا خل يي ياخذ :/
جان أخزها
رديت قلت له: وين أمك وأبوك
قال: بالبيت
قلت: وليش أنت تدور بالشارع
ما تكلم ماقال شي
الصج عيونة وأنا أسألة حسيت كأنه يبي يبكي وما أحب أشوف جذي :@

..

الموقفين خلوني أفكر في ناس تحتاج مساعدة لكن عندها عزة نفس تمنعها وممكن تشتغل بالحر وتوقف ولا تنتظر أحد يشفق عليها وفي ناس تعلم عيالها طرق التسول والكذب وبعدين يشتكون على عيالهم ضاعوا وانحرفوا مادري شنو ظروف الياهل وشنو ظروف أمه وأبوة لكن ما يصير جذي أنا من أشوف جذي تيلي البجية وأقول لو كنت مكانهم وأفكر بألف شي بس حرام هذول يهال مهما يكون ما يصير يستغلونهم على إنهم يهال وراح يكسرون خاطر الناس ويعطونهم فلوس

..
بنت أختي رفعت ضغطي بالأسئلة قلت لها اللي ما يدرس وييب درجات عالية ولا يسمع كلام أمه وأبوه وخالتة :> يضيع نفس هذا الصبي قالت خلاص خالتي بصير شاطرة وأييب نجمات وأسمع كلام ماما وبابا وخالتي
قلت أي خالة فيهم؟ قالت خالتي لطيفة قلت إي جذي أنتي أحلى بنت أخت :*

..