نكتب بالعامية اليوم.
شنو شعورك لما تحس كل شي صار يمشي سريع،اليوم بسرعة يخلص مع إني أقعد امبجر وايد وأنام متأخر هم ماكو فايدة،إمتحانات ورا بعض مدتيرم ابطن مدتيرم وبينهم كويزات،تكاليف،بحوث،تقارير وأنا أحس بالانهيار بس مكملة ولا كأنه في شي بس وايد تعبانة ومطنشة التعب على أساس فترة وتعدي بس كل شي يعدي بسرعة إلا هالتعب والضغط النفسي والجسدي والعقلي من كل صوب،جسمي وايد تعبان عيوني تعورني،صداع دايم،ريولي تعورني،اركبي يعوروني وايدي بعد،قلبي يوله ويشتاق ويحب بس مادري هل أنا غلطانه بهذا الشي؟ عقلي مو قادره أوقفه أنه يفكر،ترى جد وأنا نايمة أفكر مو مبالغة،لما أنام أقعد فجأة أسحب تلفوني أكتب شي ولما أقعد اقراه وأستغرب من نفسي،كل دقيقة نوم يقابلها دقيقة تفكير،هذا وقت النوم بس أما الوقت العادي كل دقيقة مقابلها خمس دقايق تقكير،مادري هذا شي زين ولا مو زين بس بايق كل طاقتي هالتفكير،النوت في تلفوني فضيحة فيه كل شي يطري على بالي،غير اللي أكتبهم على كتب الجامعة أو كتب القراءة،ودي أوقف مخي شهر بس ارتاح وأرد من يديد.
صايرة وايد كسلانة،أكلي صاير خرابيط ومافيهم شي ينفع لا فيتامين ولا بروتين وهذا وايد يأثر علي بس معدتي صايرة وايد سخيفة يوم زينه وعشر ما تتحمل شي حتى الماي.
أقول حق أمي باجر عندي امتحان كميته وايد وحجي وايد وباجر السبت،تقول عادي يعني شنو؟ أنت تقدرين.
أدري أقدر بس تعبانه مافيني حيل،ليش محد راضي يستوعب هالشي،مادري بس جد أصلاً لو واحد يدزني راح أطيح مافيني قدرة تحمل،زين إني أمشي للأمانة.
أدري إني وايد قوية وشجاعة وأدري كل هذا راح يصير شي يضحك لما أذكره مثل كل اللي مريت فيه،بس أنا وايد حساسة وايد ولاحظت نفسي كل يوم قاعدة أصير حساسة أكثر مادري ليش ولا شنو السبب،بس محد فاهم شي لما أتكلم أو أسوي شي،الحين وأنا أكتب قاعده أسمع صوت عيال أختي ووايد مزعجني هالشي يعني بتجرد عادي يهال وصوتهم واهم يلعبون بس هذا أشوفه ازعاج مو طبيعي،أختي تقول اشسالفتج لطيفة؟ صايرة أكثر حساسة؟
المشكلة إني أدري.
وايد أشياء تضايقني ممكن أنساها لما تلمني؟ إي راح أشوفها شي تافهه ومالها داعي. بهالشي أصير ياهل أحب وايد أحد يلمني،يمكن أفكر بمشروع لمني ولك الأجر-هاهاها- ملاقة شسوي!
لما ألم أمي تضحك تقول لا تصيرين دلوعة وحساسة وياهل؟ ردينا!!!
بالجامعة أدري إن لبسي غير عن البنات الباجي وهذا حلو ومو حلو،لأن شقوني خز يحسسونك إنك ياي من كوكب ثاني مع أني أشوف نفسي حالة صحية ممتازة،أما هم نسخ مكررة بالشكل والفكر والأسلوب،عموماً نظرتهم مو مهمة وايد لي كفعل هي ملاحظة فقط.
في شي ودي أقوله أصرخ وأفضفض بااللي بقلبي بس أدري إنه ممكن يأثر علي بجانب سلبي،علشان جذي ساكته ومكبرة دماغي،اشوي خايفة صح بس قاعدة أفكر لي جدام وأدري هذه الحياة لازم أتحمل وأتعلم وأفهم.
الحين بروح أخذ شاور وبلبس دلاق وبقعد أدرس،أعتقد بتم جذي لي باجر حزة الامتحان. الحين الساعة 7:15 بليل وامتحاني 11 الصبح وليش مافي ستاربكس يوصل؟ مادري اشكثر راح أشرب قهوة علشان أتم صاحية،وخايفة أتعب بس بتحمل لأني أقدر وهذا شي يضحك أدري،بس لازم أتحمل وأخلي اليوم يروح عادي.
ودي أكل بطاط مدور-نغزة- وذكرى ليوم حلو وايد مع بطاطتي المدورة :*
ليست هناك تعليقات:
إرسال تعليق